પ્રોમિસ..!!
તું
મને તારામાં વાવી દે
કૂંડામાં છોડ વાવતો હોય એવી રીતે
પછી હું તારામાં ઉગીશ
તારામાં વિસ્તરીશ
અને તારામાં મ્હોરીશ
પછી મારું સરનામું હશે
‘હું’
c/o ‘તું’
તારામાં હું શોર નહીં મચાઉં
તારાથી મારું કદ નહીં વધારું
ઉછીની ભીનાશ માંગવાને બદલે
મારી આંખોથી સીંચી લઇશ ફૂલોને-ફળોને પાનને..
તું એકવાર વાવી દે મને તારી અંદર
ઉગવા દે..મ્હોરવા દે..ખીલવા દે…
ભવિષ્યમાં તને લાગે કે તેં ભૂલ કરી છે
તો ત્યારે ખાલી એટલું જ કરજે,
મારાં પાનને, ફૂલને, ફળને રોજ
થોડાં થોડાં તોડવાને બદલે
કુહાડીનાં એક જ ઘાએ
ખતમ કરી નાંખજે મને
ઉફ્ફ નહીં કરીશ, પ્રોમિસ…!!
-એષા દાદાવાળા
No comments:
Post a Comment